AI ಬಟ್ಟೆ, ರೋಬೋಟಿಕ್ ಸ್ನೇಕ್ ಡ್ರೆಸ್ ಹೇಗಿದೆ ನೋಡಿ!
ಕೆಲ ತಿಂಗಳುಗಳ ಹಿಂದೆ ಕೇರಳದ ಶಾಲೆಯಲ್ಲಿ ಎಐ (ಕೃತಕ ಬುದ್ಧಿಮತ್ತೆ) ರೋಬೋಟಿಕ್ ಶಿಕ್ಷಕಿಯನ್ನು ನೇಮಕ ಮಾಡಿದ ಸುದ್ದಿ ಭಾರೀ ಚರ್ಚೆಗೆ ಕಾರಣವಾಗಿತ್ತು. ಈಗ, ಎಐ ನಮ್ಮ ದೈನಂದಿನ ಜೀವನದ ಭಾಗವಾಗುತ್ತಿದ್ದು, ಫ್ಯಾಷನ್ ಕ್ಷೇತ್ರಕ್ಕೂ ಎಂಟ್ರಿ ಕೊಟ್ಟಿದೆ. ಎಂಜಿನಿಯರ್ ಒಬ್ಬರು ಎಐ ತಂತ್ರಜ್ಞಾನ ಬಳಸಿ ವಿಶೇಷವಾದ ರೋಬೋಟಿಕ್ ಡ್ರೆಸ್ ತಯಾರಿಸಿದ್ದು, ಈ ಸುದ್ದಿ ಇದೀಗ ಸಖತ್ ವೈರಲ್ ಆಗುತ್ತಿದೆ.
ಡಿಜಿಟಲ್ ಯುಗದಲ್ಲಿ AI ತಂತ್ರಜ್ಞಾನ:
ಈ ಡಿಜಿಟಲ್ ಯುಗದಲ್ಲಿ ಕೃತಕ ಬುದ್ಧಿಮತ್ತೆ (ಎಐ) ನಮ್ಮ ಜೀವನದ ಪ್ರಮುಖ ಭಾಗವಾಗುತ್ತಿದೆ. ಆರೋಗ್ಯ, ಶಿಕ್ಷಣ ಸೇರಿದಂತೆ ಎಲ್ಲಾ ಕ್ಷೇತ್ರಗಳಲ್ಲಿ ಎಐ ತನ್ನ ಛಾಪು ಮೂಡಿಸಿದೆ. ಲೇಟೆಸ್ಟ್ ವಿಚಾರ ಏನೆಂದರೆ, ಎಐ ಈಗ ಫ್ಯಾಷನ್ ಲೋಕಕ್ಕೂ ಕಾಲಿಟ್ಟಿದೆ. ಎಐ ಟೀಚರ್, ಎಐ ಸಾಫ್ಟ್‌ವೇರ್ ಇಂಜಿನಿಯರ್‌ಗಳ ನಂತರ, ಇದೀಗ ಎಐ ಉಡುಗೆಯೂ ತಯಾರಿಸಲಾಗಿದೆ.
ಕ್ರಿಸ್ಟಿನಾ ಆರ್ನ್ಸ್ಟ್ ಅವರ ಪ್ರಯೋಗ:
ಗೂಗಲ್ ಸಾಫ್ಟ್‌ವೇರ್ ಇಂಜಿನಿಯರ್ ಹಾಗೂ SheBuildsRobots.org ನ ಸಂಸ್ಥಾಪಕಿ ಕ್ರಿಸ್ಟಿನಾ ಆರ್ನ್ಸ್ಟ್, ಎಐ ತಂತ್ರಜ್ಞಾನ ಬಳಸಿ ಮೊದಲ ರೋಬೋಟಿಕ್ ಡ್ರೆಸ್ ತಯಾರಿಸಿದ್ದಾರೆ. ಮೆದುಸಾ ಡ್ರೆಸ್‌ಗೆ ಅವರು ಚಲಿಸುವ ರೊಬೋಟಿಕ್ ಹಾವುಗಳನ್ನು ಜೋಡಿಸಿದ್ದು, ಈ ವಿಶೇಷ ಉಡುಗೆ ಫ್ಯಾಷನ್ ಪ್ರಿಯರ ಗಮನ ಸೆಳೆಯುತ್ತಿದೆ. ಕ್ರಿಸ್ಟಿನಾ ಅವರು ಎಂಜಿನಿಯರ್ ಆಗಿದ್ದರೂ, ಫ್ಯಾಷನ್ ಮೇಲಿನ ಪ್ರೀತಿಯಿಂದ ಅವರು ಈ ಪ್ರಯೋಗವನ್ನು ಕೈಗೆತ್ತಿಕೊಂಡು, ವಿಶ್ವದ ಮೊದಲ ಎಐ ಉಡುಪನ್ನು ತಯಾರಿಸಿದ್ದಾರೆ.
Also Read: ವೈರಲ್ ಸುದ್ದಿ: ಮಂಗಳೂರು-ಮಡಿಕೇರಿ ಹೆದ್ದಾರಿಯ ಭಾರೀ ಟ್ರೋಲ್ ಆದ ಸೈನ್ ಬೋರ್ಡ್
ವೈರಲ್ ವಿಡಿಯೋ:
ಕ್ರಿಸ್ಟಿನಾ ಅವರು ಈ ವಿಶೇಷ ರೋಬೋಟಿಕ್ ಸ್ನೇಕ್ ಮೆದುಸಾ ಡ್ರೆಸ್‌ನ್ನು ತಯಾರಿಸಿದ ವಿಡಿಯೋವನ್ನು ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ವೈರಲ್ ವಿಡಿಯೋದಲ್ಲಿ, ಅವರು ಈ ಡ್ರೆಸ್‌ನ್ನು ಧರಿಸಿರುವುದನ್ನು ಕಾಣಬಹುದು. “ನಾನು ಈ ಉಡುಗೆಯನ್ನು ತಯಾರಿಸಲು ಹಲವಾರು ಬಾರಿ ವಿಫಲನಾಗಿದ್ದೇನೆ, ಕೊನೆಗೆ ಆಟೋಮ್ಯಾಟಾ ಆಟಿಕೆಗಳಿಂದ ಸ್ಫೂರ್ತಿ ಪಡೆದು ರೋಬೋಟಿಕ್ ಸ್ನೇಕ್ ಉಡುಗೆಯನ್ನು ಸಿದ್ಧಪಡಿಸಿದೆ,” ಎಂದು ಹೇಳಿದ್ದಾರೆ.
ಸಾಮಾಜಿಕ ಮಾಧ್ಯಮದಲ್ಲಿ ಅಭಿಪ್ರಾಯಗಳು:
SheBuildsRobots ಹೆಸರಿನ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಹಂಚಿಕೊಂಡ ಈ ವಿಡಿಯೋ 3 ಮಿಲಿಯನ್‌ಗಿಂತ ಹೆಚ್ಚು ವೀಕ್ಷಣೆಗಳನ್ನು ಪಡೆದಿದ್ದು, ಈ ಪ್ರಯತ್ನಕ್ಕೆ ಕ್ರಿಸ್ಟಿನಾ ಅವರಿಗೆ ನೆಟ್ಟಿಗರು ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ.
ಈ ತಂತ್ರಜ್ಞಾನವು ಫ್ಯಾಷನ್ ಕ್ಷೇತ್ರದಲ್ಲಿ ಎಂಥ ಮಹತ್ತರ ಬೆಳವಣಿಗೆಗೆ ಕಾರಣವಾಗಬಹುದು ಎಂಬುದನ್ನು ಈ ವಿಡಿಯೋ ತೋರಿಸುತ್ತದೆ.
